31 July 2009

YEMA

-

Kasingnipis ng balat ng yema
ang gayak nilang kamiseta.

Pagala-gala sila
ngayong labasan ng opisina
tinatawid ang mesi-mesitang tumpok
ng mga taong nagpaparaos

ng oras at bagot.
Isang liham, maingat na nakasobre
ang kanilang pasaporte
papasok sa daungan
ng aking katiwasayan.

Ang kanilang alok:
isang maliit na supot
kuyom ang sangkurot
na pinaghalong asukal na pula
at malapot na kondensada.

Kasinggaspang ng asukal
ang garalgal

sa kanilang lalamunan.
Kasinlagkit ng kondensada

ang kanilang pangungunyapit
sa laylayan ng konsensya

ganitong kailangan nila
ng pambaon sa eskuwela.

Hinahawi ng mga bata
ang tagus-tagusang kurtina,
de-kolor na tabing
sa pagitan ng aking mata
at sa daigdig nilang waring
katiting lamang na yema.

Narinig kong inuusisa
ng babae sa katabing mesa
kung lagda ba ng kurot
ang tulduk-tuldok na asul at pula,
di maikubli-kubli
ng brasong namamaga
ng isa sa mga bata.

Narinig kong inuusisa
ng babae sa katabing mesa
kung kaanu-ano nila ‘yong isang lola,
kanina pa nakamasid sa sulok,
bakit pareho silang hinampas sa batok?

Kinabukasan sa opisina
binaon ko ang biniling yema.
Pagsubo na pagsubo ng isa,
binalot ng manipis na pait
ang nalulusaw na umaga.

5 comments:

  1. wow. bumibili ka talaga sa mga bata na nagtitinda nun? :D

    ReplyDelete
  2. Akala ko kasi malalaki 'yong mga panindang yema.

    ReplyDelete
  3. ..hi po. ahhhhhhhhm im here. hehe. galing mo naman po gumawa ng tula. hehe explore mo po blog ko and some of my links there. masaya dun. heheh.
    ..jonald18.wordpress.com ;)

    ReplyDelete
  4. tila nagbago ang huling tatlong saknong. pero balot pa rin ng papel de japon ang tema ng yema. *_*

    ReplyDelete
  5. JOAN - Salamat sa imbitasyon; huwag kang mag-alala, hahalughugin natin 'yan.

    RISE - Ang talas ah. Pero seryoso, tendency ko talagang mag-revise nang mag-revise ng mga nagawa ko na kahit dating-dati pa, kahit pa iyong mga nailimbag na.

    Nangyayari ito dahil paulit-ulit ko ring binabasa 'yong mga trabaho ko. Magkaminsan pakiramdam kong mas may isusuwabe pa 'yong tunog at pagrerenda ng salita, o di naman kaya ay nadagdagan ako ng bagong karanasan, at ang karanasang ito ay maaaring nagdudulot, sa proseso, ng mas bagong pananaw sa naisulat nang tema -- hayun, kapag ganito binabago ko na naman 'yong akda. Haha.

    ReplyDelete