Maaga tayong ginigising ng lungsod upang magtipon-tipon
sa loob ng UV Express. Isipin nating narito tayo sa hukuman
at uma-umaga, nililitis natin sa punuang bulwagan
ang mga asuntong magdamag kinalap
ng ating pagtutulug-tulugan.
Sa tagpong ito, tayo ang tumatayong lupon ng hurado.
Pambungad na pahayag: mapapanood sa TV ang buod
ng ulat. Sumasambulat sa screen ang mga bubog
ng pixel, binabasag ang eksenang pinagtatakhan natin
kumbakit tinangka pang ilingid ng kamera
gayong labis-labis naman ang ibinabahaging detalye
ng tagapag-balita: na dalawang lalake
ang natagpuan sa bangketa. Nakasingit sa bulsa
ng pantalon ang ilang hinihinalang pakete ng ebidensya
upang hindi na tayo magtanong, o mag-aksaya
ng panahon alamin kumbakit at sino, kung ano ang motibo,
at kung paano naisaksak sa loob ng balikbayan box
ang isang pares ng tao -- ang gayon kalaking patotoo
na dumating na ang padalang pagbabago.
Sa salaysay ng saksi, una nilang nadiskubre ang katawan
kasama ng iba pang kalat na kinaligtaan
ng gabing nagdaan. Hindi muna nila napansin
ang tag-isang tama ng bala; hindi inakalang tao pala
ang nasa ilalim ng lingkis ng tape
na lumulon sa buong ulo, sa lawas at braso,
sa pinantay na paa. Pahiwatig at paalala
na wala tayong dapat tandaang mukha
at walang ibang dapat tumanim sa gunita
kundi ang bintang ng pagkakasala.
Diin ng awtopsiya: nagtangka silang manlaban
sa hindi-na-bagong kapalaran ng mga tulad nilang
sadyang unang napagkakamalan. Katibayan
ang namuong dugo sa baga, ang umurong na dila,
ang sapal ng basahan sa loob ng bunganga,
ang lalamunang nabilaukan
sa sariling pagmamakaawa.
Iyon lamang. Maliban diyan ay wala nang dagdag na paratang
na makapagsasabi kung sino ang may-kagagawan.
Walang nagbigay ng sariling alibi
habang sa hinaba-haba ng gabi,
walang anumang nahuli
ang CCTV.
Samakatuwid, walang katibayan ang ating hinala
kung kaya obligado tayong ibasura
sa araw-araw na paglimot ang nakasusukang itsura
ng karahasang para lamang regalong binalot
habang mabigat na karatulang nakasabit sa ating dibdib
ang sumbat sa sarili nating pananahimik at takot.
