1.
Higanteng buwitreng nakadapo sa dibdib ng Africa
ang anino ng Sudan sa mapa. Walang pagtataka
kung di man maubusan ng dahilan
ang hapdi sa hamba ng luha
ngayong kapwa tayo nakikipagtitigan
sa saglit na dinagit
ng nag-aabang na kamera.
Sa harap, isang bata ang naudlot
sa pagmamadaling umabot
sa pinamumudmod na botelya
ng tubig na malinaw, ginayat na mais
at lugaw, takal-takal na ayudang
magpapakalma sana
sa ga-mundong kalam, walang-katapusan
ngayong ipinagbibigay-alam
ng bilog na bilog na tiyan.
Walang bitbit kahit ano,
maliban sa nakabilad na balat at buto,
lumalawig ang tanghaling-tapat
sa loob ng litrato
ganitong lumikas na palayo
maski ang sarili niyang anino.
Kumbakit pagpikit ay lalong nasusumpungan
ang kalabisan ng mga sinususukat
nating kasalatan? Minamasdan ngayon
ang panoramang nag-uudyok
sa paulit-ulit nating pagmulat
sa nakasiksik na bangungot
sa ating talukap. Sa ganitong pagkakataon
pinakamahirap tanggapin
na kahit sa malapitang sipat,
wala ni isang pares ng yapak
ang naroroon sa buhangin.
2.
Dalawang batang magkapatid ang nasawi matapos silang makulong sa nasunog na bahay sa Tondo, Maynila. Ang kanilang bangkay, natagpuang magkayakap kasama ang alagang aso at pusa. GMA News, October 23, 2019
Hinahalughog ng mata
ang lahat
ng ayaw makita.
Maaaring madurog
kapag binulabog
ang katahimikang
umiilanglang sa sulok.
Nilagom na ng usok
ang paghihingalo. Alikabok
na lang nang datnan
ang ungol at tahol
na di nahabol
ng dumating
na saklolo.
Inabot silang nakagapos
ng bumbero
sa sariling yapos
na di hahantong
sa pagtatapos.
Kung may mensaheng
hatid
itong
magkapatid, siguro
ang ibig
nilang
ipabatid: kung paano
ginawang permanente
ng pamamaalam
ang kanilang
paglalapit.
